تەکنیکەکانی بەکارهێنانەوەی وێنە ئەرشیفییەکان لەبەرهەمهێنانی فیڵمی بەڵگەنامەیی تایبەت بە کیمیایی بارانکردنی هەڵەبجە

ئەم توێژینەوەیە هەوڵێکە بۆ تێگەیشتن لەو تەکنیکانەی کە بۆ بەکار‌هێنانی وێنە ئەرشیفییەکان لەبەرهەمهێنانی فیڵمە بەڵگەنامەییەکانی تایبەت بە کیمیایی بارانکردنی هەڵەبجە، لە ڕێکەوتی ١٦ی مارتی ١٩٨٨ و ڕۆژانی دواتریدا، بەکارهاتوون. بۆ ئەو مەبەستە توێژەر هەشت فیڵمی لە چوار کەناڵی ئاسمانیی کوردیی KNN, NRT, Rudaw, K24 کە لە نێوان ساڵانی ٢٠١٤-٢٠٢٢ دا بەرهەمهێنراون، دەستنیشان کردووە. ڕێبازی توێژینەوەکە جۆری وەسفییە؛ وەک ئامڕازیش شێوازی شیکردنەوەی ڕواڵەتیی وێنە بەکارهاتووە، کە یەکێکە لە ئامڕازە باوەکانی شیکردنەوەی ناوەڕۆکە میدیاییەکان.  لێرەوە چەند خشتەیەک وەک یەکەی شیکاریی بۆ ئەو تەکنیکانە ئامادەکراون کە بۆ ئەم فیڵمانە سوودیان لێبینراوە؛ و لە کۆتاییشدا توێژینەوەکە گەیشتۆتە کۆمەڵێک دەرئەنجام، لەوانە تێگەیشتن لەوەی کە بە گوێرەی پۆلینکردنەکەی بیڵ نیکۆڵس، زۆرینەی ئەم فیڵمانە تەنها لە سێ شێوازدا خۆ دەنوێنن کە بریتین لە هەریەک لە شرۆڤەیی، چاودێریی، و ئاوێتەیی بە ڕیژەی کەمترین، لە کاتێکدا هەرسێ شێوازەکەی تری هەڵبەستیی، نمایشیی و ڕەنگدانەوەیی پەنایان نەبراوەتە بەر و بەکارنەهێنراون.