A REVIEW ON THE CAUCASIAN KURDISH NOVEL (The Examples of Hewarî, Gundê Mêrxasan and Hopo)

Wêje û ax digel ku wekî du têgehên ji hev dûr xuya dikin jî, her tim bandor li hev kirine û ev bandor ji aliyek ve karaktera wêjeyê diyar kiriye û ji aliyê din de watedayinên têgiha axê li gorî nêrînên xwe fireh an teng kiriye. Mebesta me ji têgiha axê ev e ku ew axa ku komeke civakê li serê dijî, bi têkiliya xwe ya bi wê re jiyanek ava dike û ji encama vê têkiliya hevberî çand derdikeve meydanê, ku ev çand li ser zemînê erdnîgariyekê ava dibe. Digel ku pirî caran em welatan ji axeke yekpare teşekulbûyî dizanin jî ya rast di nava sînorên welatekî de gelek erdnîgariyên serbixwe an jî ji hev cuda hene ku carina çanda wan wekî çanda du miletên cuda ji hev dûr e. Ev ne realîteyeke wilo ye ku divê em veşêrin an nebînin. Lewre veşartina her realîteyê di têgihîştina civakê û ferdên wê civakê de kêmsiyekê peyda dike. Herêma Kafkasyayê tevî paşxaneya Serhedê, yek ji wan herêman e ku em dikarin wê wekî herêmeke xwerû îfade bikin lê digel vê xwerûtiyê ew di nava xwe de jî xwedî gelek taybetmendiyên ji hev dûr e. Folklor, Êzdyatî, Sîstema Sovyetê, Serhildan hin têgeh in ku bêtirî di nava vê erdnîgariyê de û bi periyodeke dîrokî ve girêdayî watedar dibin. Wêjeya ku li Kafkasyayê der çûye û romanên ku hatine nivîsîn di nava vê realîteyê de bi van têgihan nixumîne ku ev hemî me ber bi dem û devereke taybet ve dibin.