Plotësi dhe objektivitet në analizën e një autori rilindas

Në hapësirën e një shekulli nga Shpallja e Pavarësisë, pas një morie studimesh rreth figurave të rëndësishme që kontribuan në këtë arritje dhe për këtë qëllim jo rrallë kanë përdorur si penën ashtu edhe pushkën, ekzistojnë ende figura të tilla që s’janë ndriçuar plotësisht në tërë përmasat e tyre. Këtij qëllimi mund t’i shërbejnë monografitë e llojit integral që shkrijnë historizmin dhe metodën biografike me analizën e plotë dhe të hollësishme të veprës. Monografia “Mihal Grameno - jeta dhe vepra 1871-1931” (505 f.) e studiuesit Thanas L. Gjika është një prej tyre. Ky punim monografik është botuar prej shtëpisë botuese DDS, shtypshkronja MILENIUMI I RI, Durrës, me redaktor gjuhësor Halim Malokun. Në fund vepra pasurohet nga një aparat shkencor, një përmbledhje në anglisht, një album fotografik të larmë dhe vlerësimet e studiuesve prof. Jorgo Bulo dhe prof. Agim Vinca. Mihal Grameno, Heroi i Popullit, është shembulli më i spikatur i poetit luftëtar shqiptar që shkëlqen midis grupit të rilindësve tanë si L. Gurakuqi, H. Mosi, R. Siliqi, të cilët ndoqën shembullin e poetëve ballkanas Kristo Botev i bullgarëve, Shandor Petëfi i hungarezëve që luftuan me pushkë e penë për çlirimin e atdheut të vet nga zgjedha osmane.