Vështrim përqasës i konektorëve shtesorë në veprën e Pjetër Bogdanit “Cuneus Prophetarum” dhe në veprën e Pjetër Budit “Doktrina e Kërshtenë”

Synimi i këtij studimi është përshkrimi dhe analizimi i konektorëve të tekstit në veprën e Pjetër Bogdanit “Cuneus Prophetarum”1 në vështrim përqasës me konektorët e tekstit të përdorur në veprën “Doktrina e Kërshtenë” të Pjetër Budit. Studimet për mjetet lidhëzore në veprën e Bogdanit dhe të Budit mungojnë, prandaj përmes këtij punimi synojmë të shohim ndryshimin diakronik të përdorimit të konektorëve të tekstit, më konkretisht të konektorëve shtesorë, në këto dy vepra të shkruara në shekullin e 17-të (respektivisht në vitin 1618 dhe në vitin 1685), duke i krahasuar me konektorët e tekstit në shqipen e sotme. Një vend të veçantë në këtë punim do të zërë dhe krahasimi i lidhëzave (të përdorura si konektorë teksti) në veprën e Bogdanit dhe të Budit dhe atyre të përdorura në veprën e parë të shqipes “Meshari” i Gjon Buzukut. Për këtë vështrim krahasues jemi bazuar në punimin e zgjeruar dhe të thelluar të studiuesit Emil Lafes “Lidhëzat te libri i parë shqip”.