Një çerdhe fjalësh shqipe me lidhje etimologjike

Është fjala për njësi leksikore të ndryshme, por që kanë midis tyre lidhje historike shumë interesante. Në gjendjen e sotme njësitë e grupit mund të shfaqen me zhvillime të ndryshme fonetike, morfologjike e semantike, por analizat tregojnë se kemi të bëjmë me përftime prej një baze të përbashkët. Është e rëndësishme të theksojmë në këtë mes se kemi zgjedhur të përdorim termin “fjalëpërftim” për të treguar zhvillime etimologjike fjalësh dhe jo formime të reja apo që vijnë nga modele të gjalla fjalëformimi. Përftimet etimologjike prej një baze të përbashkët u përkasin dy kategorive të ndryshme që do të kërkonin analiza etimologjike në dy nivele. Në nivelin e parë të analizës etimologjike do të arrinim deri te rrënjët e fjalëve të çerdhes. Këtu do të kërkoheshin: evidentimi i zhvillimeve të mundshme fonetike dhe veçimi i mjeteve të dikurshme të fjalëformimit, çka do të shpinte te veçimi i rrënjës.