Perceptime dhe horizonte për frazeologjinë e gjuhës shqipe Jani Thomai, “Studime Gjuhësore II”, Tiranë, 2017

Instituti i Gjuhësisë dhe i Letërsisë, gjatë viteve të fundit, ka mundësuar përgatitjen për botim të korpusit shkencor të akademikut Jani Thomai. Në hapësirat e tij janë përmbledhur artikuj e studime që shpërfaqin jo vetëm përvojën studimore, pjekurinë krijuese1 të një gjuhëtari të zëshëm, por edhe evolucionin e dijes gjuhësore shqiptare në këtë lëmie. Ardhja e plotë e veprës së tij i shërben studentit, mësuesit dhe kërkuesit shkencor si një çelës i nevojshëm për të njohur më gjerë e në mënyrë të thelluar leksikun dhe frazeologjinë shqipe, por edhe si udhëçelje për vizione të reja, që kapërcejnë pragun tradicional të kundrimit leksikologjik, semantik, sintaksor dhe ecin në shtigjet e mendimit bashkëkohor europian e më gjerë, d.m.th. në largpamësi që i përkasin gjuhësisë së diskursit, psikolinguistikës, si dhe gjuhësisë informative2.