Trés cartes inédites ente’l Padre Galo y Pepín de Pría afayaes na investigación del Proyectu Fernán Coronas

Nos más de dos años d’actividá del Proyectu Fernán-Coronas viénense dando a conocer los frutos de la nuestra investigación, sofitada nun llabor fundamental de clasificación y dixitalización de los fondos documentales conservaos del Padre Galo. Col envís de continuar compartiendo los nuestros resultaos, presentamos equí trés cartes inédites ente Fernán-Coronas y Pepín de Pría afayaes nel archivu personal d’Oliva Avello, que nos permiten afondar significativamente na rellación qu’esistió ente estos dos autores asturianos y completar, en bona midida, la imaxe que nos apurría la poca correspondencia yá publicada. Asina, fadremos un breve repasu peles cartes espublizaes previamente, espondremos el contestu d’apaición de los manuscritos y les sos carácterístiques formales, desendolcaremos un análisis d’esta correspondencia faciendo énfasis nes cuestiones que nos abulten de mayor interés y, finalmente, apurriremos unes reproducciones dixitales de los manuscritos estudiaos ―y d’otros documentos que complementen el nuestru trabayu― y ufiertaremos una trescripción de los mesmos.