Ekstrakt nga vëllimi “Horizonte Etnokulturore”, botimi i dytë, Tiranë 2021, 1131 faqe

Abstract

Vëllimi “Horizonte etnokulturore” shënon të 20-tin të botimeve të prof. Ramazan H. Bogdani gjatë një periudhe 44-vjeçare, 1976-2020. I trajtuar me nocionet emërtuese horizonte dhe etnokulturorë, sigurisht që dëshmon për një gjithësi materiale dhe shpirtërore të traditave tona, në vështrimin etnografik, folklorik, antropologjik, gjeografik, historik dhe psikologjik. Rrjedhimisht, përmes “Horizonte etnokulturore” autori është përpjekur të parashtroj njëfarë universi në zhanrin artistiko - shkencor të kulturës popullore kombëtare. "Horizonte Etnokulturore" është sa një hulumtim profesional po aq edhe një horizont autobiografik, një vepër që prek njëherësh ndjesitë e përjetimet njerëzore të një gjyshi, i cili ia kushton atë së mbesës, dhe përpjekjen studimore të një profesionisti të plotësuar e veprues në fushën e artit, studiues e veprues në fushën e shkencës. Përjetime e investigime, pjesëmarrje dhe meditime, oponenca e studime, gjer te shqiptarët e Vjetër të Ukrainës. Ndezullia e jetës aktive të autorit, në art dhe shkencë, si pjesëmarrës e studiues, udhëtimet dhe çfarë ai ka mbledhur prej tyre, takimet e portretizimet, gjetjet, janë lëndë për horizontet, etnokulturorin dhe autobiografikun. Për t'u veçuar, nga tematika, mund të vihet në dukje dëshmimi i prof. Bogdanit se identitetet etnokulturore shqiptare i ka të personifikuara nëpërmjet trojeve në Shqipëri, Kosovë, Çamëri, shqiptarëve në Maqedoni, në Malin e Zi, arbëreshëve të Italisë, arvanitëve në Greqi, diasporës në Mandricë të Bullgarisë, në Zarë të Kroacisë, si edhe shqiptarëve të Vjetër të Ukrainës. Ndryshe nga botimet e mëparshme të prof. dr. Ramazan Bogdanit, lënda dhe përgjithësisht të konceptuarit e këtij vëllimi sikur e personalizojnë fizionominë e figurës së tij me atë të krijuesit në fushën e artit dhe eksploruesit e studiuesit në fushën e shkencës.