Shkollat Austro-Hungareze në vilajetin e Kosovës (1911-1912)

Abstract

Disfata që pësoi Perandoria Habsburge në luftë me Prusinë për dominim në botën gjermane, në vitin 1866, e detyroi qeverinë e Vjenës që politikën e saj të jashtme ta drejtonte drejt Ballkanit, të vetmen trevë ku ajo mund të shtrinte ndikimin e saj. Që atëherë, qeveria e Vjenës orientoi tërësisht politikën e saj të jashtme drejt Lindjes. Në këtë kuadër Shqipëria dhe çështja shqiptare do të bëhen pjesë e programit politik dhe strategjik të saj në Gadishullin Ballkanik. Ballkani duhej t’i zëvendësonte Austrisë humbjet e territoreve në Itali dhe të rolit udhëheqës në Gjermani, si dhe t’i rikthente dinastisë së Habsburgëve prestigjin e humbur.