Minoriteti Bullgar (Maqedonas) në vitet 1925-1939

Abstract

Minoriteti bullgar gjatë periudhës së Zogut njohu një zhvillim të qetë dhe paqësor të identitetit të tij etnik e kulturor. Marrëdhëniet me qeverinë shqiptare ishin përgjithësisht të mira. Një problem delikat që u fut në marrëdhëniet mes këtij minoriteti dhe qeverisë shqiptare ishte lëvizja nacionaliste bullgare (maqedonase) që vijonte të ishte aktive në këtë periudhë. Qysh në vitin 1925 administrata e Zogut vijoi të përballej me problemin e lëvizjes bullgare që zhvillohej në Jugosllavi dhe në Greqi. Ajo mori masa energjike dhe mbajti qëndrime të prera për të ndaluar veprimtarinë e komitëve bullgarë që hynin në territorin shqiptar nga Jugosllavia dhe nga Greqia, e cila drejtohej kundër këtyre dy shteteve fqinjë. Për t’i shpëtuar ndjekjes së autoriteteve jugosllave, komitët bullgarë, zakonisht u vetëdorëzoheshin autoriteteve kufitare shqiptare në postën e Goricës. Pasi merreshin në pyetje, ata dërgoheshin në portin e Sarandës nga ku largoheshin prej territorit shqiptar.