Tipare të ligjërimit administrativ në gjuhën shqipe

Abstract

Artikulli i mëposhtëm ka synimin modest të vërë në dukje disa veçori të përgjithshme të ligjërimit administrativ në shqipe. Në këtë artikull merret parasysh ligjërimi administrativ në cilësinë e një varieteti gjuhësor, që karakterizon tekstet me të cilat administrata publike komunikon me rrjetet jashtë institucionit, me qytetarët, me subjekte të tjera publike brenda për brenda strukturës apo dhe me vetë personelin e administratës. Si shembull mund të sjellim: qarkoret, certifikatat, formularët e ndryshëm për vetëdeklarim, formularët për deklarimin e të ardhurave, lajmërimet për shpallje konkursi, procesverbalet e policisë e tekste të tjera të kësaj natyre, të cilat studiuesi Xh. Lloshi i ndan në grupime të tjera më të mëdha duke veçuar këto kategori: tekstet ligjore, shkresat, aktet ekonomike-tregtare, formularët (...)1.