Bardhyl Demiraj: areali kulturor i veriut në shek. Xvi-xix, Botime Onufri, Tiranë, 2017

Abstract

Viti 2017 është shënuar nga realizimi i një botimi të rëndësishëm në fushë të gjurmimeve albanologjike e pikërisht nga ai me titull Areali kulturor i Veriut në shek. XVI-XIX, Botime Onufri, Tiranë, 2017, me autor studiuesin Bardhyl Demiraj. Prej vitesh tashmë disponojmë në bibliotekat dhe tavolinat e punës disa botime të natyrës kritike e filologjike të përpiluara prej studiuesit Bardhyl Demiraj, të gjitha të vlefshme për këdo që orientohet ndaj gjurmimesh të mirëfillta ekdotike mbi një periudhë me rëndësi për historinë e shkrimit shqip e për letërsinë e shkruar shqipe. Botimi kritik e filologjik i një vepre me destinacion leksikografik e që u mbështet për të dalë në dritë të shtypit prej Kongregacionit të Propaganda Fide-s si Dicionari latinisht-shqip i Frang Bardhit (Romë, 1635)1, studimet që orientojnë më së miri drejt njohjes së profilit dhe veprimtarisë komplekse të një prelati me emër në shekullin e tetëmbëdhjetë si Gjon Nikollë Kazazi2, botimi i pajisur me një aparat të vyer filologjik e kritik mbi Aktet e Koncilit të parë të Arbënit (1703)3, dhe gjurmime e kërkime të tjera që në të njëjtën vazhdë vijojnë të jenë udhërrëfyes për një fushë studimore si ajo e teksteve të vjetra shqipe përfaqësojnë arritje mjaft të vyera në lamije të gjurmimeve albanologjike.