¿Son sordes dafechu les oclusives sordes intervocáliques n’asturianu?

Abstract

Conocida la sonorización de les consonantes oclusives sordes /p t k/ en posición intervocálica en delles llingües romániques peninsulares aprecióse'l mesmu comportamientu n’asturianu actual. Pa valorar el so algame, esti artículu tien como oxetivu esponer los resultaos del analís espectrográficu de diverses amueses nel que se controlaron variables llingüístiques como'l tipu de consonante, el contestu, l'acentu y la modalidá oracional. Amás, tuviéronse en cuenta variables sociollingüístiques como'l llugar de procedencia de los informantes, el xéneru y l'estilu de llingua. Pa esti fin trabayóse con un corpus de fala semidirixida y otru de fala espontánea. Analizóse col programa Praat caúna de les realizaciones de les consonantes /p t k/ en contestos intervocálicos nos que se valoró la presencia de golpes glotales nos oscilogrames de la señal pa delimitar la sonoridá de les consonantes. Los resultaos confirmaron la hipótesis de partida: n'asturianu contémplase un aumentu de la lenición, particularmente en fala espontánea. A lo cabero, valoróse la repercusión fonolóxica d'esta sonorización.