Маѳъ Маѳонъвичь: Cyfieithiad Newydd o’r Mabinogi i (Hen) Rwsieg (Маѳъ Маѳонъвичь: A New Translation of the Mabinogi to (Old) Russian)

Abstract

Y cwestiwn cyntaf, efallai, yw a oes angen cyfieithiad newydd, a dau gyfieithiad o’r Mabinogi i’r Rwsieg yn bodoli’n barod? Yn anffodus, mae’r cyfieithiadau hynny yn anghyflawn ac weithiau yn wallus. Cafwyd y cyfieithiad cyntaf gan Liudmila Volodarskaia (2000): Кельты — Валлийские сказания — Мабиногион [Celtiaid — Chwedlau Cymreig — Mabinogion], ac am fod hwn yn gyfieithiad o Saesneg Charlotte Guest, mae’n Fictoraidd iawn ei naws (gw. yr adolygiad gan Parina (2003)). Gan Vadim Erlichman y cafwyd yr ail gyfieithiad, Мабиногион. Волшебные легенды Уэльса [Mabinogion. Chwedlau Hudol Cymru], a hwnnw bellach wedi ei argraffu ddwywaith (Erlichman 1995; Erlichman 2002). Trafodir yr argraffiad cyntaf gan Parina (2003) a’r ail argraffiad gan A. Falileyev (2002). Mae Erlichman yn dal iddo gyfieithu o destun Llyfr Coch Hergest — ac felly o Gymraeg Canol — ond oherwydd y camgymeriadau niferus, gwêl yr adolygwyr fod lle i amau a yw hynny’n hollol wir. Digon yw nodi i’r llythyren [v] Gymraeg gael ei thrawsgrifo yn [f] Rwsieg, yn hytrach na fel [v], er mwyn cadw enwau yn ‘hudol’ ac yn ‘egsotig’ (Erlichman 1995: 216).