16-21 yaşlı qızlarda çanağın pelviometrik indekslərinin xüsusiyyətləri

Abstract

İşin məqsədi - Gənclik yaş kateqoriyasında normal və dar çanaqlar üzərində  pelviometrik parametrləri və indeksləri təyin etməkdən ibarətdir. Tədqiqatın material və metodları: Tədqiqatın materialına daxil edilmiş çanaq qrupları aşağıdakılardan ibarət olmuşdur: normal formalı çanaqlar (14 ədəd), ümumi bərabər daralmış (6 ədəd) və köndələn daralmış (6 ədəd) formalar. Köndələn diametri 11,8 sm-dən az və kiçik çanaq çıxacağının köndələn diametrinin ölçüləri 10,5 sm-dən az çanaqlar köndələn daralmış formaya aid edilmişlər. Digər parametrlərin (həqiqi konyuqata, diaqonal konyuqata, köndələn diametr, daraqarası məsafə, geniş hissənin köndələn ölçüsü və s.) orta göstəricilərdən 1,5 sm-dən az olmasına görə onları çanağın ümumi bərabər daralmış formasına aid  etmişik. Nəticələr. Aparılan tədqiqatlar nəticəsində əldə olunmuş məlumatlara  görə, parametrlərin maksimal göstəriciləri daha çox normal formalı çanaq qrupunda təsadüf olunmuşdur. Minimal göstəricilərə isə ümumi bərabər daralmış  çanaq formasında daha tez-tez rast gəlinir. pelviometrik əlamətlər üzrə gənclik yaş dövründə statistik əhəmiyyətli fərqlər qeyd olunur. Bu zaman qeyd edilmiş parametrlər üzrə nəinki dar və normal formalı çanaqlar, eləcə də dar konfiqurasiyalı çanaqlar öz aralarında fərqlənir. Pelviometrik əlamətlərin maksimal göstəriciləri normal çanaqlar qrupunda müşahidə olunur, minimal göstəricilər isə ümumi bərabər daralmış çanaqlar qrupunda müəyyən edilir. Köndələn daralmış formalar bu yaş qrupunda parametrlərin ədədi göstəricilərinə əsasən aralıq mövqe tuturlar.