MGA EPEKTIBONG KAGAMITANG PANTEKNOLOHIYA SA PAGTUTURO NG PANITIKANG FILIPINO

Ang layunin ng pag-aaral na ito ay masuri ang pangunahing gamit na kagamitang panteknolohiya ng mga guro sa Bauko sa pagtuturo ng Panitikang Filipino sa kanilang silid-aralan at pagkatuto ng mga mag-aaral. Layon nitong sagutin ang mga sumusunod na tanong: a) Ano-ano ang mga kagamitang panteknolohiya na karaniwang ginagamit ng mga guro sa pagtuturo ng panitikan? b) Gaano kaepektibo ang mga ito sa pagtuturo ng Panitikan? c) Ano-ano ang mga hadlang na nakakaapekto sa paggamit ng panteknolohiya sa pagtuturo ng Panitikan? Sa pamamagitan ng deskriptibong pamamaraan ng pag-aaral, nilarawan ang mga kagamitang panteknolohiya na karaniwang ginagamit ng mga guro sa pagtuturo ng panitikan. Batay sa isinagawang survey sa 20 guro mula sa Bauko, napagtanto na ang Microsoft Powerpoint ang isa sa mga pangunahing gamit na kagamitang panteknolohiya. Kasunod nito ang Kahoot na naging lubos na epektibo sa pagtuturo. Natuklasan din na ang pangunahing hadlang sa paggamit ng panteknolohiya sa pagtuturo ng Panitikan ay ang kakulangan sa kasanayan ng mga guro. Kaya't isinasaad na mahalaga ang pagsasanay upang mapalawak ang kanilang kaalaman sa paggamit ng makabagong teknolohiya. Isa pang hadlang ay ang kakulangan ng kagamitan at internet para sa mga mag-aaral. Sa pagtatapos ng pag-aaral, inirekomenda na ang Kagawaran ng Edukasyon ay maglaan ng budget para sa pagsasanay ng mga guro sa paggamit ng makabagong teknolohiya. Kasama rito ang alokasyon ng pondo para sa kagamitan at internet ng mga mag-aaral. Layunin nito ang masiguro ang masusing paggamit ng panteknolohiya sa pagtuturo ng Panitikan, na maglalagay ng mas mataas na kalidad sa edukasyon ng mga mag-aaral sa nasabing lugar.