Ürək qusuru (TETRADA FALLO) əməliyyatdan sonra hamiləliyin gedişatı və aparılması (Klinik vəziyyət)

Hamiləlik dövründə ürək xəstəlikləri ən əhəmiyyətli tibbi ağırlaşmalardan biridir. Ana ölümünün ümumi, qeyri mamalıq səbəblərindən biridir. Hamiləliklərin təxminən 1%-i ürək xəstəliyi ilə ağırlaşır. Bu halların idarə edilməsi ana və yenidoğul-muşa qulluq edən bütün xidmətlərdə çətinlik yarada bilər. Hamiləlik ürək-damar funksiyasında bir sıra dəyişikliklərə səbəb olur. Bu dəyişikliklərin son nəticəsi ürək fəaliyyətinin artmasıdır. Hamiləlik və ürək xəstəliyin tələbləri ürəyə çox gərginlik yaradır. Ürək cərrahiyyəsindəki irəliləyişlər, anadangəlmə və ya qazanılmış ürək xəstəliyi olan pasientlərin həyat keyfiyyətini və ürək-damar sisteminin işləmə səviyyəsini yaxşılaşdırdı [1,2]. Bu xəstəliklər hamiləliyin 0.1- 4 %-ni çətinləşdirir. Ürək əməliyyatı sonrası hamilə bir xəstənin idarə edilməsi bütün səhiyyə işçiləri üçün kompleks bir məsələdir.