Vortfarado per dishako de radikoj kaj kungluo de la dishakaĵoj

Ĉi tiu artikolo komence priskribas kaj klasas kelkajn manierojn formi novajn konceptojn per mallongigo de vortoj kaj vortgrupoj, dediĉante specialan atenton al vortkunmetado per 'tondado kaj gluado'. Vortoj formitaj per tiu kunmeta tekniko, praktikata precipe en la angla lingvo, iel similas al etimologie hibridaj radikoj en Esperanto, sed dum ĉi tiuj estas kreitaj kiel nerompeblaj radikoj laŭeble facile rekoneblaj internacie, la unue menciitaj estas kreitaj por esprimi kombinojn de diversaj konceptoj. De la angla lingvo multaj vortoj tonditaj kaj gluitaj estas disvastigitaj al aliaj lingvoj, ĉu kiel kunmetaĵoj laŭ la sama tekniko, ĉu kiel importaĵoj de la kunmetaĵoj mem kiel leksikaj unuoj. Kunmetado per tondado kaj gluado ne laŭas la aglutinan karakteron de Esperanto, sed ĉar tiel estas kreataj multaj vortoj, kiuj rapide akiras internacian uzon, urĝas esplori, ĉu eblas ellabori sistemon - aŭ almenaŭ strategion - por doni taŭgan Esperantan formon al la konceptoj, kiujn la tonditaj kaj gluitaj vortoj esprimas.