Aperis ampleksa vortaro esperanta-germana: Recenzo de vortaro de Erich-Dieter Krause

Aperis la granda vortaro esperanta-germana de Erich-Dieter Krause - verko longe atendata kaj arde dezirata, ĉar la samspeca antaŭulo, Butin & Sommer, Wörterbuch Esperanto-Deutsch, datumas de la 1950-aj jaroj. La kompilinto estas profesia lingvisto (profesoro pri la indonezia lingvo en la Universitato de Lepsiko) kaj leksikografo, jam konata en la esperantista mondo pro sia germana-esperanta vortaro de 1983. La aktuala verko estas tiel ampleksa (80 000 kapvortoj), ke oni, por trovi kompareblan objekton, devas sin turni al Plena Ilustrita Vortaro de Esperanto (PIV ) aŭ al la Enciklopedia Vortaro Esperanta-Germana de Wüster (1923–1929). Kiel laborkvanto plenumita de unu persono ĝi estas supermezura, klarigebla nur per diligenta kolektado kaj registrado dum pluraj jardekoj.