Michel Duc Goninaz, lingvisto kaj akordionisto

Michel Duc Goninaz mortis... jen kion mi aŭdis telefone de malnova konatino. La ŝoko estis vere tre granda, ĉar mi tute ne antaŭvidis tiel rapidan foriron. Kun Michel ni konatiĝis antaŭ preskaŭ 40 jaroj; mi tiam estis 36-jara kaj li 42. Kiam kadre de la gazeto de la junaj SAT-anoj mi kreis la 'Epikuran grupon', tuj Michel aliĝis al tiu tute neformala grupo. Post la kreado de La KancerKliniko, Michel kontribuos al ĝi ekde la numero 4, oktobro/novembro/decembro 1977 kun artikolo kies titolo estis 'El la taglibro de neŭrozulo'. Poste lia artikolo havos la nomon 'El la taglibro de nekuracebla optimisto'.