Tapat Ang Teatro Para sa Tao

Abstract

Malamang sa hindi, ang karamihan sa ating narito ngayon ay marami-rami na ring naging karanasan sa paglikha at pagtatanghal ng dula sa ating mga paaralan o komunidad. Ngunit lahat din tayo ngayon marahil ay nagdaraan sa isang panahon ng agam-agam, dahil masidhi at malalaki ang mga problemang kinakaharap natin at ng ating teatro sa kasalukuyan, lalo na sa pandemya at sa pamamahala ng ilang opisyal na tila nawawala sa sarili. Ano nga ba ang magiging papel ng teatro sa harap ng mga nakapanlulumong pangyayari sa ating lipunan ngayon? Ano ba ang hamon ng dulaan sa mga artista ng ating madilim at mapanganib na kasalukuyan? Ano nga ba ang maningning na mithiing magiging ilaw, gabay, lakas, at inspirasyon ng gawaing pantanghalan sa ating panahon, at marahil sa susunod pang mga panahon?