Varia II: Éanainmneacha agus éanseanchas i bhfilíocht na scol II

Abstract

Leanann sé seo ar varium in Ériu 71 (2021), 155–9, agus tá an cur chuige céanna anseo arís agam. Is é sin dornán éanainmneacha in ord aibítre a úsáid mar áis chun eagar a chur ar thagairtí éagsúla don éanlaith atá aimsithe agam san fhilíocht. Cadhan: Seo an Ghaeilge oifigiúil ar ‘brent goose’ (Branta bernicla) anois agus is é ‘gé ghiúrainn’ an leagan oifigiúil i gcás an ‘barnacle goose’ (Branta leucopsis). Chonacthas sampla aonair san fhilíocht de éan gioghrann = ‘barnacle goose’ sa varium ar a leanann sé seo (s.v. gioghra), ach ní hionann sin is a rá go mbeadh idirdhealú i dtólamh ag na filí idir an dá chineál gé, ná go bhfuil aon locht ar ‘barnacle goose’ i roinnt de na haistriúcháin thíos. Is dócha nach n-aithneodh Tadhg Ó Cobhthaigh cineál amháin thar an gcineál eile pé scéal é, agus a chumas mar éaneolaí bainte de ag tinneas an ghrá, mar is léir ón rann deiridh sa dán Corrach do chodlas a-réir: