Muitalusaid mearkkašupmi otná servodagas: Sámi lágaid ozus narratiiva láhkametoda bokte

Abstract

Artihkal guorahallá sámi lága ja láhkaprinsihpaid narratiiva láhkametoda vehkiin Gufihttara lonuhus -muitalusa vuođul. Narratiiva láhkametoda leaba hábmen eamiálbmotlága dutkit Val Napoleon ja Hadley Friedland, ja dat lea geavahuvvon viidát Kanadas maŋimuš nuppelogi jagi. Artihkkala ulbmil lea ovddidit eamiálbmotláhkadutkamuša Sámis ja sámi lágaid guorahallama servodaga ja árbbi siskkobealde, ovdanbuktit sámedutkamuššii metoda, man eará eamiálbmotlágaid dutkit leat geavahan buriin ja mávssolaš bohtosiin, ja kártet Gufihttara lonuhus -muitalusa lágaid ja láhkaprinsihpaid. Artihkkala loahpas suokkardan mo gávdnon láhkaprinsihpaid sáhttá geavahit otná servodathástalusaid čoavdimis dego mánáidsuodjalusas, ja makkár áššiid váldit vuhtii, jos sámedutkamušas háliidit joatkit narratiiva láhkametoda geavaheami gávdnan dihtii sámiid iežaset lágaid ja láhkaprinsihpaid. Sámis gávdnojit dutkamušat sámi dáhpelágas, sámiid vieruid ja njuolggadusaid rollas nationála lágain ja láhkaásaheamis ja das mo gearretmearrádusat leat váldán vuhtii sámi dáhpelága, muhto narratiiva láhkametoda ii leat ovdal geavahuvvon sámi muitalusaid analyseremis ja sámi lágaid gávdnamis.