Format e presionit politiko-ekonomik në Kosovë nga administrata shtetërore jugosllave gjatë viteve 1945-1960

Abstract

Populli i Kosovës gjatë Luftës së Dytë Botërore ka dhënë një kontribut të madh për çlirimin e Kosovës, në luftën kundër okupuesve fashistë e nazistë. Këtë kontribut e dokumentojnë brigadat ushtarake të krijuara në Kosovë, numri i viktimave, i të plagosurve, dëmtimet e shkatërrimet në përgjithësi. Populli shqiptar i Kosovës iu bashkangjit popujve të tjerë të Jugosllavisë, me idenë dhe premtimet nga krerët e lartë komunistë për vetëvendosje dhe deklarim të lirë për të ardhmen politike të Kosovës. Premtimet joshëse pas përfundimit të luftës u shndërruan në dhunë politike, likuidime të nacionalistëve shqiptarë, presione ekonomike dhe nxitje të shpërnguljeve masive të shqiptarëve për në Turqi. Në këtë punim, duke iu referuar burimeve arkivore dhe botimeve relevante mbi këtë temë, do të trajtohen në mënyrë analitike disa forma dhe metoda karakteristike të cilat u aplikuan nga nomenklatura politike serbe dhe organet shtetërore jugosllave mbi popullatën shqiptare të Kosovës në vitet e para të pasluftës.