De Sallustio Latine Praelegendo: Causae, Rationes et Consilia Docendi

Abstract

Multae sunt viae, multi modi quibus utentes possumus auctores rimari eosque discipulis nostris in scholis monstrare et aperire. Describuntur hac in symbola rationes Sallustii in Vniversitatibus studiorum praelegendi, subsidia didascalica et exercitia varia, quae omnia sunt usu et tractatione coram discipulis a nobis probata. Praeterea significantur causae cur multum iuvet linguam Latinam per loquelam ipsam Latinam docere, et quae beneficia ex his rationibus capiant discipuli qui sermonis rudimenta iamdudum perdidicerunt atque se auctoribus legendis et excutiendis dederunt. Referuntur postremo et exempla probationum et summa percontationis, ad quam, cursu academico peracto, harum rationum non amplius expertes discipuli responderunt.