Om kardinaltal og det å oppfatte kardinaltal

I denne teoretiske artikkelen diskuterer vi kardinaltal og kva det vil seie å oppfatte kardinalitet og kardinaltal. Artikkelen går inn på detaljar som krev ei avklaring av desse omgrepa. Her hentar vi inspirasjon blant anna frå matematikk, og vi tar utgangspunkt i kva kardinaltal er i matematikk. Gjennom eit tankeeksperiment identifiserer vi ein type kunnskap/forståing/idear som synes å vere sentral for å oppfatte kardinaltal; vi kallar det mengdetaloppfatning. Det er idear som er relatert til omgrep som til dømes numerical magnitude understanding og approximate number system, men som desse omgrepa likevel ikkje er dekkande for. Vi argumenterer for at mengdetaloppfatning dreier seg om særleg to prinsipp som vi kallar tal-til-mengdeseparasjon og tal-separasjon. Vidare vert omgrepet mengdetaloppfatning plassert i høve til blant anna teljing og to ulike former for subitisering som vi kallar spontan antalbestemming og semispontan antalbestemming.