« Dekouvèt Ayiti » oswa « Nouvo Monn » Lan, sa se manti ki dwe kaba

Abstract:Mwen toujou sonje jan m te aprann istwa d Ayiti pandan sis premye ane lekòl, nan klas elemantè ak mwayen. Nou te aprann nan manyèl istwa ki te rele Histoire d'Haïti : Cours élémentaire et moyen. Liv sa a, ki te sèvi pou plizyè jenerasyon, se J. C. Dorsainvil ki te ekri l ansanm ak Frè Enstriksyon Kretyèn.Anpil nan nou, ata jounen jodi a, pran ansèyman sa yo pou lajan kontan san nou pa janm kesyone kontni liv sa a. Lekòl pa te janm sèvi ak metòd ki fasilite refleksyon kritik kote aprenan yo gen posibilite pou yo gade lòt analiz sou evennman istorik y ap aprann yo. Nan dividal lide n aprann sou peyi nou, sa nou rele « Dekouvèt Ayiti » a, se yonn ki pi make nou e ki pi enpòtan paske l chita nan nannan istorik fondasyon nasyon nou an. Se sa k fè l nesesè pou n etidye istwa peyi nou jan sa dwe fèt. Ki vle di : avèk metòd ki pou ede n kesyone, reyaprann epi dezaprann yon pil ansèyman.