Árbediehtu ja biologalaš diehtu Deanu ja luosa birra: Mo nannet luossanáliid?

Abstract

Deatnu rievdá issoras jođánit, eaige čielga sivat maŋimuš jagiid luosaid vátnumii gávdno. Deanu árbediehttit čilgejit máŋggaid rievdadusaid, mat luosa eallinbirrasis leat áiggiid čađa dáhpáhuvvan ja mo dat váikkuhit lussii. Deanu dutkanjoavkku mandáhta mielde guollebiologat galget vuhtiiváldit árbedieđu iežaset dutkamušain. Sii sirrejit árbedieđu oasážiidda, maid geahččalit ovttaid mielde guorahallat kvantitatiiva metodaiguin. Máŋggaid árbedieđuid birra ii gávdno dárkilis dáhta, mii dahká kvantitatiiva metodaid geavaheami váttisin. Go biologat eai bastte čájehit duohtan árbediehttiid cuiggodemiid, sii konkluderejit ahte ii oktage daid fuolain leat okto sivvan luossanáliid njiedjamii. Meara dilli ja sivat maŋimuš jagiid jođánis rievdadusaide eai gieđahallojuvvo sin raporttain. Árbedieđu vuođul sáhttá gáibidit máŋggaid hálddašandoaimmaid nannet luossanáliid, mat gusket luosa eallindili buorideami.