La sencovasteco de kelkaj vortoj en Plena Ilustrita Vortaro de Esperanto: Eseo por instigi al diskutado

Abstract

Gaston Waringhien havis antaŭ si gigantan taskon, kiam li redaktis la difinojn de Plena Ilustrita Vortaro (PIV). Lia plej granda merito estas, ke li skrupule kaj fidele esploris la sencon de ĉiuj Fundamentaj, oficialaj kaj Zamenhofaj radikoj kun iliaj plej gravaj kunmetaĵoj, surbaze de miloj da ekzemploj de ilia uziteco, kaj redonis el la klasikaj tekstoj multajn el tiuj ekzemploj en la vortaro. En tio li ja sekvis la striktajn principojn de scienca leksikografio: reprodukti en la vortaro la faktan uzadon de la vortoj en la praktika vivo.